admin اسلام آباد .
ڈیجیٹل میڈیا الائنس پاکستان کے صدر سبوخ سید کی دعوت پر گلگت بلتستان حکومت کے ترجمان شبیر میر کے ساتھ ایک اہم نشست کا اہتمام کیا گیا، جس میں ممتاز صحافیوں، میڈیا نمائندگان اور تعلیمی شخصیات نے شرکت کی۔
اس نشست میں چیئرمین رحمتہ للعالمین و خاتم النبیین اتھارٹی خورشید ندیم، پاکستان کے معروف تحقیقاتی صحافی عمر چیمہ، بی بی سی اردو سے اعظم خان، ڈان نیوز کے رپورٹر عمر باچا، جیو نیوز کے نثار عباس، اسلامک یونیورسٹی سے ناصر فرید، نوجوان صحافی سید رسول اور وی نیوز سے عمیر احمد شریک ہوئے۔
اجلاس میں گلگت بلتستان میں متوقع انتخابات، نگران حکومت کی مجموعی کارکردگی، مقامی سیاسی صورتحال، صحافت کو درپیش چیلنجز، میڈیا کے مؤثر کردار اور موسمیاتی تبدیلیوں کے اثرات پر تفصیلی تبادلہ خیال کیا گیا۔ شرکاء نے اس امر پر زور دیا کہ شفاف اور منصفانہ انتخابات خطے میں سیاسی استحکام اور عوامی اعتماد کے لیے ناگزیر ہیں۔
نشست کے دوران ترجمان وزیر اعلیٰ نے وزیر اعلیٰ گلگت بلتستان جسٹس ریٹائرڈ یار محمد کی جانب سے صاف شفاف اور آزادانہ انتخابات کی یقین دہانی کا بھی ذکر کیا گیا، جسے شرکاء نے خوش آئند قرار دیتے ہوئے جمہوری عمل کے لیے ایک مثبت پیش رفت کہا۔
مزید برآں، ڈیجیٹل پلیٹ فارمز کے بڑھتے ہوئے اثرات، ذمہ دار صحافت، اور عوامی مسائل کو مؤثر انداز میں اجاگر کرنے کی اہمیت پر بھی گفتگو ہوئی۔ اجلاس کے اختتام پر اس عزم کا اظہار کیا گیا کہ میڈیا، پالیسی سازوں اور سول سوسائٹی کے درمیان تعاون کو فروغ دے کر صحافت کو مزید مؤثر، باخبر اور عوام دوست بنایا جائے گا۔
