admin سکردو(نامہ نگار ) ڈسٹرکٹ پولیس لائن سکردو میں قائم آئی ٹی لیب میں پولیس کانسٹیبلز کی پیشہ ورانہ صلاحیتوں میں اضافے کے لیے کمپیوٹر ٹریننگ کا سلسلہ جاری ہے۔ اس دو ہفتے پر مشتمل تربیتی کورس کے دوران پولیس اہلکاروں کو جدید آئی ٹی مہارتوں سے آراستہ کیا جا رہا ہے تاکہ دفتری امور اور ڈیجیٹل سسٹمز پر کام کو مزید مؤثر بنایا جا سکے۔ آئی ٹی لیب کی انچارج اور ایس ایچ او تھانہ وویمن سکردو شازیہ بانو کی نگرانی میں منعقدہ اس کورس میں صبح کے اوقات میں لیڈی پولیس کانسٹیبلز جبکہ دوپہر کے وقت مرد کانسٹیبلز کو تربیت دی جا رہی ہے۔ تربیتی پروگرام میں کمپیوٹر کی بنیادی تعلیم شامل ہے، جس میں انگریزی و اردو ٹائپنگ، ایم ایس ورڈ، ایم ایس ایکسل، پاور پوائنٹ پریزنٹیشن کے ساتھ ساتھ یو این او ڈی سی کے مختلف ماڈیولز سے متعلق آگاہی بھی فراہم کی جا رہی ہے۔پولیس حکام کے مطابق اس تربیت کا مقصد پی ایس آر ایم ایس اور ایچ آر ایم ایس جیسے اہم ڈیجیٹل سسٹمز پر مؤثر اور درست طریقے سے کام کو یقینی بنانا ہے، تاکہ پولیس کی دفتری کارکردگی اور سروس ڈیلیوری میں بہتری لائی جا سکے۔اس تربیتی سیشن کے ٹرینرز میں اے ایس آئی شازیہ بانو، ایس ایچ او تھانہ وویمن سکردو اور اے ایس آئی خدیجہ بتول، ایڈیشنل ایس ایچ او تھانہ وویمن سکردو شامل ہیں۔ پولیس حکام کا کہنا ہے کہ اس نوعیت کی تربیت پولیس فورس کو جدید تقاضوں سے ہم آہنگ کرنے میں اہم کردار ادا کرے گی۔
